裝備係呢個旅程中一個好重要既課題。
係加德滿都等等既城市入面就無乜所謂，但去到山上，就只得你自己同Porter揹住行李行10幾日，物資不足想買時，一係好貴，一係無得買，所以你既裝備要齊全得黎又唔可以太重揹死大家。
由於本人係冬天(2月-3月)去，裝備亦比較多同難計算。
好消息係大部份加德滿都既酒店都俾你長時間寄存行李，所以你可以將只會係城市中使用既物品留係酒店，行完山返黎先拎返。
山上必需品
以下物品一定要有，唔好慳：
- 背包(2個)：一個大既(70L左右)俾Porter揹，一個細既(30L左右)自己揹
- 行山用禦寒衣物：雪山一定會凍，而點著就同其他差唔多凍既地方一樣，但要盡量輕、透氣、防水同埋快乾。要注意山上溫差大得黎你又唔會知具體溫度 – 果度唔會有天氣預測或報告
- 太陽眼鏡及防曬用品：雪會反射太陽光，容易曬傷甚至雪盲。眼鏡要UV400既鏡片，防曬cream當然要最勁果隻
- Boot：以應付崎嶇不平既山路，並保護雙腳避免拗柴，以及禦寒
- 羽絨睡袋：晚上入住既Teahouse既被褥一定唔夠用
- 戰術電筒/頭燈：好多teahouse入面都唔會有燈，房間既燈亦相當暗
- 保溫瓶(1L以上)：令自己係凍環境下keep住全日有暖水飲
- 廁紙：山上廁所不提供廁紙
- 消毒濕紙巾：山上未必有熱水俾你沖涼(熱力同水都短缺)，唔少時候都係濕紙巾抹身就算
- 拖鞋：係房內赤腳行會凍死
- 旅遊保險：一定要揀可以提供緊急援助果種，出左事都有人救
- Credit limit過HKD 40000既credit card：因為山上出事既話就要call直升機，至少USD 5000
- 感冒/止痛/腸胃/退燒藥及膠布：出事或救命用
- Cash (USD)：唔駛解釋啦下話
山上建議物品
- 行山杖(1 pair)：減輕體力消耗之餘，仲可以測試地面是否穏固。建議係尼泊爾買，平得黎夠頂10幾日，用完掉左都唔心痛。
- 朱古力：中途肚餓/口痕時食用
- 糖：口淡淡果陣食用，而你一定會口淡淡，因為山上食物唔甜
- 漁夫之寶：防止喉嚨痛，佢既刺激性亦有助激勵自己
- 寶礦力沖劑：幫助回復體力或舒緩水土不服
- Buff：多用途頭套，可一次過取代帽及頸巾
- 即棄內褲：山上唔會洗到衫
- 鏡：因為好多Teahouse入面都無
一般會帶埋上山但未必用得著既物品
- 梳洗用品：唔會唔帶但山上又未必有水俾你去梳洗
由於本人會影相，所以帶埋一set相機相關物品及腳架。
最後俾Porter既大背包重量約20kg，自己揹既小背包重量約8kg。
—————————————————————————————————-