13 Feb 2015 出發

因為平所以選擇搭馬航去吉隆坡再轉機去尼泊爾首都加德滿都,過程好順利,係有兩件事:

  1. 由於今次行李比較多,所以要放背包上頭頂行李架,對本人來說係好罕有既行為
  2. 馬航飛機餐,極‧度‧難‧食!食開垃圾食物既本人都頂唔順,食唔夠一半就放棄

晚上11點到達加德滿都機場,一進入入境大樓,第一個廣告牌竟然係華為(Huawei)手機。
尼泊爾方面居然將對遊客黎講係第一印象既牆壁俾外國人做廣告,會唔會太唔注重國家形象呢?
而華為………你係廣告上話你自己係尼泊爾第3大流動網絡供應商,排第3有咩咁值得出個廣告黎講呢?

加德滿都機場行李領取處出名混亂,所以等左半個鐘先拎到行李。

出到機場,見到導遊Birendra Duwadi,坐佢安排既車去酒店。
雖然已經差唔多夜晚12點,但由於第二日係星期六(尼泊爾係六日工作,逢星期六放假),再加上係情人節,所以街上都幾多人。

去到”酒店”……都唔知算唔算係酒店喇,
出面無乜燈,房入面無熱水,電視就只係睇到半島電視台(都唔知間房係咪俾塔利班攪過),
但咁夜,唔理住,由得佢啦。